من وحي الاغاني : ناويها

انا جايلك وناويها ......... هكذا تغنى محمد حماقي في البومه الجديد
ولكن ماذا افعل انا اذا كان من اريد ان اراه لم اره منذ فترة طويلة بلغت حتى كتابة هذه السطور ثلاث اشهر واسبوع ويومين وتلاتاشر ساعة تقريبا ؟

لا ادري هل هو فعلا منطقي ان احسب هذة المسافة او هو زى ما يمكن ان يقال " واحشنى " طبعا مش من المنطقي ان اعد الفترة دى لواحد ولد - ما يولع - انا عارف اللى ف دماغ القارئ ولكنها خواطر فعلا اسجلها لاعز شخصية قابلتها

اخر مرة تقابلنا كانت هناك ف الدمياطي حيث طلب ام علي هو واجب مقدس - ف الحقيقة انا جربت مرة ام علي من غيرها ما كانش ليها طعم خالص - كل حاجة فعلا ماكانش ليها طعم المكان والكاشير وام علي شخصيا , ارى البعض يغمز بعينه الشمال وهو يقول ايوة يا عم دانت مقطع نفسك ...... واخر يقول اوعى يا با دة ايه الرومانسية دى ولكن ردا على هذا وذاك انا غير مرتبط ولكنها مجرد احاسيس مع صديق احبه جدا ومش مشكلة الصديق دة انه على هيئة " بنت "

وحشتينى جدا وحشتنى ضحكتك وهزارك ....... وحشنى صوتك وكلامك
وحشتنى لحظات الجوع القاتلة اللى بنمر بيها لما بنكون ف الدمياطى
او كميات العصاير اللى ممكن نضربها واحنا ف الشارع
وحشتنى دمعتك ونظراتك اليائسة ....... وحشنى صوت بكائك
وحشنى احساسى بالدفا لما اكون معاكي ف شهر يناير
وحشتنى رساليلك ورناتك
لما هانروح تقوليلي اللى يروح الاول يرن للتانى وعمرك مارنيتى ...... وحشتينى

انا عارف انى كلامى هنا مش ممكن يكون ليه معنى كتير بس انا عارف انك مشغولة جدا وقانون الصدفة هو اللى بيحكمنا دلوقتى يعنى اخر حاجة ممكن اتوقعها اننا نستنى صدفة تجمعنا وساعتها ياترى هل هانكون فاضيين ساعتها او لا ؟ كلها احتمالات بالصدفة
تصدقينى لو قلتلك انى بتمنى افضي نفسي يوم واقضيه معاكى بس انا عارف انك ف المقابل مش هاتلاقي الوقت اللى تكونى فيه فاضية عشان نتفق فيه على معاد
ياترى هل الموقف دة سببه ان الواقع بيشدنا ناحية دوامة من دواماته ؟ طب بعد كام سنة كمان ممكن نعمل ايه ؟

انا فعلا نفسي اقابلك واسمعلك زي الاول نفسي اتكلم كتيير زي ما عملنا زمان ..... عارفة حاجات مفيش حد هايفهمنى فيها غيرك بس انا عارف انك هنا .....انا مش بحلم او بتجيلي اوهام اليقظة انا حاسس بيكي على طول ...يا بنتى دا احنا لو مرتبطين مش هانبقى كدة ابدا

انا فعلا ناويها ..... هاجي ف يوم اسيب كل ارتباطاتى وكل مواعيدك ونبقى بس انتى وانا ....... وام علي بالمكسرات